Azərbaycan Respublikasının Prezidenti yanında Dövlət İdarəçilik Akademiyasında “Narkotik vasitələrin qanunsuz dövriyyəsi və istifadəsi ilə bağlı “Mən öz gələcəyimi seçirəm” adlı tədbir keçirilib. Tədbiri giriş sözü ilə açan Dövlət İdarəçilik Akademiyasının rektoru, akademik Urxan Ələkbərov yeniyetmə və gənclərin narkotik asılılığı və digər zərərli vərdişlərdən qorunması, gənc nəslin savadlı, vətənpərvər ruhda böyüməsi, sağlam inkişaf etməsinin önəmini qeyd edib.
Daha sonra tədbir Akademiyanın müşaviri Zaur Məmmədovun moderatorluğu ilə davam edib. Səbail rayonu Polis İdarəsinin rəisi, polis polkovniki Hikmət Qasımov çıxış edərək Daxili İşlər Nazirliyinin narkotik vasitələr ilə mübarizə tədbirləri haqqında məlumat verib, polislərin çevikliyi və peşəkarlığı sayəsində bu il daha çox narkotikin dövriyyədən çıxarıldığını qeyd edib. Həmçinin, respublikamızda narkotik vasitələrə qarşı mübarizənin xeyli gücləndiyini, bu sahəyə cavabdeh olan dövlət orqanlarında fəallığın artırıldığını vurğulayıb.
Daxili İşlər Nazirliyinin KİV və İctimaiyyətlə Əlaqələr şöbəsinin rəisi, polis mayoru Elşad Hacıyev son illərdə respublika ərazisində narkomanlığa və narkotik vasitələrin qanunsuz dövriyyəsi ilə mübarizə sahəsində bir sıra təşkilati və əməli işlər görüldüyünü qeyd edərək,narkotik vasitələrin qanunsuz dövriyyəsi ilə mübarizənin real vəziyyətə uyğun qurulması, regional şöbələrin və ərazi polis orqanlarının aidiyyəti struktur qurumlarının işinin düzgün koordinasiyası və yerlərə idarəçilik təsirinin artırılması məqsədi ilə respublika ərazisində narkotiklə bağlı kriminogen vəziyyət mütəmadi olaraq təhlil edildiyini vurğuladı. Həmçinin, respublika ərazisində narkotiklərlə bağlı cinayətlərin aşkar edilməsi, həmin cinayətləri törədən şəxslərin və mütəşəkkil dəstələrin ifşa olunması və qanunsuz dövriyyədən külli miqdarda narkotik vasitələrin çıxarılması üçün ciddi dönüş yaradılması istiqamətində məqsədyönlü tədbirlərin davam etdirildiyini qeyd etdi.
Dövlət İdarəçilik Akademiyasının Ümumi İşlər üzrə prorektoru, dosent Cəfər Eyvazlı və Siyasi idarəetmə fakültəsinin dekanı professor Elçin Əhmədov narkomanlığın Azərbaycan gəncliyinə vurduğu ziyandan və narkotiklərə qarşı mübarizədən, narkotiklə mübarizə çərçivəsində ictimai qınağın və antinarkotik təbliğinin sosial yönümlü aparılmasının vacibliyindən, yeniyetmə və gənclərin narkotik asılılığı və digər zərərli vərdişlərdən qorunması, gənc nəslin savadlı, vətənpərvər ruhda böyüməsi, sağlam inkişaf etməsi istiqamətində bu kimi tədbirlərin əhəmiyyətini qeyd ediblər.
Çıxışlardan sonra tələbələr movzu ilə bağlı tələbələrin sualları cavablandırılıb.