Azərbaycan Respublikasının Baş Prokurorluğu Elm-Tədris Mərkəzində hüquqşünaslıq ixtisası üzrə təhsil alan tələbələr arasında hüquqi biliklərə dair müsabiqə keçirilmişdir. Müsabiqənin məqsədi hüquqi biliklərin təbliği, gənc hüquqşünasların təhsilinə, onlarda hüquqşünaslıq ixtisası üzrə ilkin peşə vərdişlərinin formalaşdırılmasına töhfə verilməsi, prokurorluq orqanları ilə hüquq ictimaiyyəti, ali təhsil müəssisələri arasında əməkdaşlıq əlaqələrinin genişləndirilməsi olmuşdur. Müsabiqədə ali təhsil müəssisələrində hüquqşünaslıq ixtisası üzrə təhsil alan tələbələr iştirak etmişlər. Bilik yarışında Azərbaycan Respublikasının Prezidenti yanında Dövlət İdarəçilik Akademiyasının 4-cü kurs hüquqşünaslıq ixtisası üzrə təhsil alan H191 qrupunun tələbələri Rufulla Vüqar, Calalova Jalə, Əlizadə Qabil, Abdullayeva Zəmilə, Əhmədli Nərmin təmsil edərək birinci yerə layiq görülmüşdülər. Qalib gələn tələbələri Azərbaycan Respublikasının Prezidenti yanında Dövlət İdarəçilik Akademiyasının rektoru akademik Urxan Ələkbərov qəbul edib. Rektor, əldə etdikləri uğurlar üçün tələbə gəncləri təbrik etmiş, onlara gələcək təhsillərində, həyatlarında uğurlar arzulamışdır.