Azərbaycan Respublikasının Prezidenti yanında Dövlət İdarəçilik Akademiyasının (DİA) nəzdində fəaliyyət göstərən “Heydər Əliyev Dövlət İdarəçilik Məktəbi”ndə 15 İyun – Milli Qurtuluş Gününə həsr olunmuş elmi-praktik konfrans keçirilib. Konfransda DİA-nın rektoru akademik Urxan Ələkbərov müstəqil dövlətimizin qurucusu Ümummilli Lider Heydər Əliyevin tarixi xidmətləri barədə məlumat verib. Rektor müstəqil Azərbaycanın qurucusu, Ümummilli Lider Heydər Əliyevin siyasi hakimiyyətə qayıdışının müstəqillik tarixinə Milli Qurtuluş Günü kimi daxil olmasından, 1993-cü ildə xalqın tələbi ilə hakimiyyətə yenidən gələn Ulu Öndərin Azərbaycanı parçalanmaqdan və vətəndaş müharibəsindən xilas etdiyini xatırladıb. Rektor qeyd edib ki, bu gün dahi rəhbər Heydər Əliyev tərəfindən əsası qoyulmuş və Prezident İlham Əliyevin uğurla inkişaf etdirdiyi innovativ idarəetmə texnologiyalarının nəzəri əsaslarının işlənilməsi, onların təcrübədə tətbiqi nəticəsində bir çox uğurlara imza atılıb. U.Ələkbərov müstəqil Azərbaycanın uğurlu inkişafında Azərbaycan Respublikasının Birinci vitse-prezidenti Mehriban Əliyevanın xüsusi rolu olduğunu qeyd edib. Elmi-praktik konfransda çıxış edən Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov, Milli Məclisin deputatı professor Hikmət Babaoğlu, Xarici İşlər Nazirliyinin xüsusi tapşırıqlar üzrə səfiri Elşad İsgəndərov Ümummilli Lider Heydər Əliyevin şəxsiyyətinin böyüklüyündən, ölkəmizdə demokratik, hüquqi dövlət quruculuğu istiqamətində həyata keçirdiyi uğurlu islahatlardan danışıblar. Çıxışlarda Ulu Öndərin Azərbaycanın dövlətçilik maraqlarını həmişə üstün tutduğu vurğulanıb. Qeyd edilib ki, Ümummilli Lider Heydər Əliyev xalqın tələbi ilə Bakıya gəldi. Xilaskarlıq missiyasını öz üzərinə götürən dahi şəxsiyyət müdrik qərarlar qəbul edərək xalqın etimadını doğrultdu. Hadisələrin daha faciəli nəticələrə gətirib çıxarmaması üçün öz müdrik sözünü dedi, vətəndaş qarşıdurmasının qarşısını aldı. Ulu Öndər Heydər Əliyevin xilaskarlıq missiyası tariximizə Milli Qurtuluş Günü kimi daxil oldu. Ümummilli Lider Heydər Əliyevin respublika rəhbərliyinə vaxtında və yenidən qayıdışı ölkəmizi məhv olmaqdan qurtardığı, onun qətiyyəti xalqa ruh yüksəkliyi gətirdiyi, eyni zamanda, ölkədə sabitlik və əmin-amanlıq yaratdığı qeyd olunub.