Azərbaycan Respublikasının Prezidenti cənab İlham Əliyevin 11 dekabr 2014-cü il tarixli, 387 nömrəli Fərmanı və həmin sənədə edilmiş 15 may 2025-ci il tarixli dəyişikliklər əsasında həyata keçirilən dövlət idarəçiliyi üzrə peşəkar inkişaf proqramı sistemli şəkildə davam etdirilir. 23 sentyabr 2025-ci ildə Azərbaycan Respublikasının Prezidenti yanında Dövlət İdarəçilik Akademiyasında başlanmış bu təlim prosesi “Sosial-iqtisadi inkişafın təhlili və proqnozlaşdırılması” və “İctimai-siyasi və humanitar məsələlər” şöbələrinə rəhbərlik edən kadrların idarəetmə sahəsində institusional və analitik bacarıqlarının inkişaf etdirilməsini hədəfləyir. Təlim Akademiyanın rektoru, akademik Urxan Ələkbərov tərəfindən keçirilir.

Bu gün keçirilən təlim “Prezident İlham Əliyevin idarəetmə texnologiyaları: Liderlik” mövzusuna həsr olunmuşdur. Sessiya çərçivəsində ümummilli lider Heydər Əliyevin formalaşdırdığı dövlətçilik və idarəçilik prinsiplərinin Prezident İlham Əliyev tərəfindən müasir dövrün tələblərinə uyğun olaraq daha da inkişaf etdirildiyi vurğulanmışdır. Qeyd edilib ki, Heydər Əliyevin idarəetmə siyasəti Azərbaycanın uzunmüddətli inkişaf strategiyasının formalaşmasında əsaslı rol oynamışdır. Təlim iştirakçıları ölkəmizin son illərdə qazandığı böyük nailiyyətlərin düzgün qurulmuş idarəetmə modelinin nəticəsi olduğunu xüsusi vurğulamışlar. Müzakirələrdə qeyd olunmuşdur ki, strateji baxışa, çevik qərarvermə prosesinə və şəffaf idarəetmə mexanizmlərinə əsaslanan bu model Azərbaycanı iqtisadi, sosial və humanitar sahələrdə yeni mərhələyə yüksəltmişdir.

Təlim zamanı Prezident İlham Əliyevin rəhbərliyi ilə həyata keçirilən idarəçilik islahatları, institusional modernləşmə və innovativ idarəetmə texnologiyalarının tətbiqi geniş şəkildə təhlil edilmişdir. Eyni zamanda ölkə rəhbərliyi ilə yanaşı Birinci vitse-prezident Mehriban Əliyevanın idarəetmə fəaliyyətində humanitar siyasət, sosial layihələr və institusional inkişaf sahəsində əldə etdiyi uğurların dövlət idarəçiliyinin bütövlükdə effektivliyini artırdığı vurğulanmışdır.

Dörd moduldan ibarət olan uzunmüddətli ixtisasartırma kursu iqtisadi, sosial, humanitar və korporativ idarəetmə istiqamətlərində rəhbər şəxslərin bilik və bacarıqlarını təkmilləşdirməyi qarşıya məqsəd qoyur. Proqram çərçivəsində iştirakçılar müasir idarəetmənin əsas alətləri, inkişaf göstəricilərinin formalaşdırılması və ölçülməsi, nəticəyönümlü fəaliyyət, strateji planlaşdırma və dövlət sektorunda innovasiya yanaşmaları üzrə praktiki bacarıqlar qazanacaqlar.