28 noyabr 2025-ci il tarixində Azərbaycan Respublikasının Prezidenti yanında Dövlət İdarəçilik Akademiyasında (DİA) Türkiyə Respublikasının Yurtdışı Türkler və Akraba Topluluklar Başkanlığının (YTB) sədri cənab Abdulhadi Turus və onu müşayiət edən nümayəndə heyətinin iştirakı ilə görüş keçirilmişdir.

DİA-nın rektoru, akademik Urxan Ələkbərov tədbiri açaraq qonaqları salamlamış və görüşün məqsədi, əhəmiyyəti barədə məlumat vermişdir. Rektor qeyd etmişdir ki, qlobal çağırışların artdığı bir dövrdə dövlət idarəçiliyində yeni yanaşmaların öyrənilməsi və tətbiqi xüsusi önəm kəsb edir. O, həmçinin Azərbaycan və Türkiyə Respublikasının dövlət idarəçiliyi sahəsindəki təcrübələrinin bir-birini tamamladığını və bu istiqamətdə əməkdaşlığın iki ölkə arasında qarşılıqlı faydalı nəticələr verə biləcəyini vurğulamışdır. Akademik Ələkbərov qlobal siyasi sistemdə idarəetmə institutlarının çevikliyi, innovativ idarəçilik modellərinin tətbiqi və insan kapitalının inkişafının əsas prioritetlərdən biri olduğunu xüsusi qeyd etmişdir.

Görüş zamanı YTB-nin sədri Abdulhadi Turus geniş məruzə ilə çıxış etmişdir. O, Türkiyənin diaspora siyasətinin əsas istiqamətləri, konseptual çərçivəsi və strateji hədəfləri barədə ətraflı məlumat vermişdir. Turus bildirmişdir ki, YTB-nin fəaliyyəti yalnız xaricdə yaşayan türklərin dəstəklənməsi ilə məhdudlaşmır, həm də qardaş xalqlar arasında akademik və mədəni əlaqələrin gücləndirilməsinə xidmət edir. O, YTB-nin təqaüd proqramları, gənclər təşəbbüsləri, mədəni layihələri və akademik mübadilə proqramlarının gələcək illərdə daha da genişləndiriləcəyini qeyd edərək DİA-nın bu əməkdaşlıq çərçivəsində mühüm rol oynadığını vurğulamışdır.

Daha sonra DİA-nın İqtisadiyyatın dövlət tənzimlənməsi kafedrasının müdiri, Milli Məclisin komitə sədri Azər Əmiraslanov çıxış etmişdir. O, Azərbaycan–Türkiyə əməkdaşlığının iqtisadi idarəetmə sahəsində strateji əhəmiyyətini qeyd edərək bildirmişdir ki, müasir iqtisadi çağırışlar dövlətlərdən daha çevik, analitik və innovativ qərarvermə yanaşmaları tələb edir. Deputat yeni iqtisadi trendlərin, rəqəmsal idarəetmənin və regional inteqrasiya layihələrinin iki ölkə arasında əməkdaşlıqda mühüm yer tutduğunu vurğulamış, bu sahələr üzrə gənc mütəxəssislərin hazırlanmasının vacibliyini diqqətə çatdırmışdır.

DİA-nın Beynəlxalq münasibətlər kafedrasının professoru, Siyasi Araşdırmalar İnstitutunun rəhbəri, millət vəkili Elman Nəsirov Azərbaycan–Türkiyə münasibətlərinin tarixi və müasir inkişaf dinamikası barədə çıxış etmişdir. O, iki ölkə arasındakı siyasi və diplomatik əlaqələrin dünyada analoqu olmayan strateji müttəfiqlik modeli olduğunu bildirmişdir. Millət vəkili həmçinin vurğulamışdır ki, Azərbaycan və Türkiyə əməkdaşlığı təhlükəsizlik və enerji sahələri ilə məhdudlaşmır, həm də inteqrasiya olunmuş diplomatik strategiyaların formalaşdırılması baxımından böyük əhəmiyyət daşıyır.

Elm və beynəlxalq əlaqələr üzrə prorektor, professor Elvin Əzizbəyov çıxışında bildirmişdir ki, DİA Türkiyənin aparıcı universitetləri və elmi qurumları ilə birgə layihələrin icrasını davam etdirir. O, qarşıdakı illərdə bu əməkdaşlığın daha da genişləndirilməsi, elm və təhsil mövzularında konfransların təşkili, yeni doktorantura proqramlarının yaradılması və müasir akademik tədris istiqamətlərinin tətbiqi kimi təşəbbüslərin nəzərdə tutulduğunu vurğulamışdır.

Tədbir çərçivəsində təhsil proqramlarının dəstəklənməsi, eləcə də mədəni, sosial və akademik sahələrdə mümkün əməkdaşlıq perspektivləri müzakirə olunmuşdur.

Sonda professor-müəllim heyəti qonaqlara öz suallarını ünvanlamış, görüş xatirə fotosu ilə yekunlaşmışdır.