07 noyabr 2025-ci il tarixində Azərbaycan Respublikasının Prezidenti yanında Dövlət İdarəçilik Akademiyasında Azərbaycan Respublikasının Ədliyyə Nazirliyinin əməkdaşları üçün “Azərbaycanın xarici siyasəti: suverenliyin və tarixi ədalətin bərpası” mövzusunda növbəti təlim təşkil olunub. Təlimdə Dövlət İdarəçilik Akademiyasının “Qarabağ İrsini Araşdırma Mərkəzi”nin rəhbəri, siyasi elmlər doktoru, professor Elçin Əhmədov çıxış edib.

Tədbirin əsas məqsədi Azərbaycanın müasir xarici siyasətinin prioritet istiqamətləri, milli maraqların qorunması və dövlət suverenliyinin tam bərpası prosesinin elmi-nəzəri əsaslarının öyrənilməsi olub. Mühazirə zamanı Azərbaycanın beynəlxalq münasibətlər sistemində mövqeyi, xarici siyasətdə tarixi ədalətin bərpası, regional təhlükəsizlik və sülh təşəbbüsləri mövzularına xüsusi diqqət yetirilib.

Professor qeyd edib ki, Prezident İlham Əliyevin rəhbərliyi ilə həyata keçirilən praqmatik və balanslaşdırılmış xarici siyasət nəticəsində Azərbaycan beynəlxalq arenada öz mövqeyini gücləndirib, ərazi bütövlüyünü və tarixi ədaləti bərpa edib. Bu siyasət milli maraqlara əsaslanaraq regional sabitliyin və dayanıqlı inkişafın təmin edilməsinə yönəlib.

Təlim zamanı iştirakçılarla interaktiv müzakirələr aparılıb, xarici siyasətin yeni çağırışları, diplomatik təşəbbüslər və Azərbaycanın beynəlxalq tərəfdaşlıq strategiyaları barədə fikir mübadiləsi həyata keçirilib.

Tədbirin sonunda iştirakçılar mövzu üzrə əldə etdikləri biliklərin dövlət idarəçiliyində, xüsusən də beynəlxalq əməkdaşlıq sahəsində tətbiqinin əhəmiyyətini vurğulayıblar.