DİA-nın rektoru akademik Urxan Ələkbərovun rəhbərlik etdiyi nümayəndə heyəti İspaniyanın paytaxtı Madriddə səfərdədir
Dek 13 , 2016 – 01:43
Madrid, 13 dekabr
Avropa İttifaqı tərəfindən maliyyələşdirilən, Azərbaycan Respublikasının Prezidenti yanında Dövlət İdarəçilik Akademiyası (DİA) və BMT-nin İnkişaf Proqramının birgə həyata keçirdikləri “Azərbaycan Respublikasında dövlət qulluğu üzrə təlimlərə dəstək layihəsi” çərçivəsində DİA-nın rektoru akademik Urxan Ələkbərovun rəhbərlik etdiyi nümayəndə heyəti İspaniyanın paytaxtı Madriddə səfərdədir.
Səfər çərçivəsində İspaniyanın Maliyyə və İctimai Funksiyalar Nazirliyində və Milli Dövlət İdarəçilik İnstitutunda keçirilən görüşlərdə Azərbaycan ilə İspaniya arasında dövlət qulluğu sahəsində əməkdaşlığın perspektivləri müzakirə olunub.
Görüşdə təqdimatla çıxış edən Urxan Ələkbərov Azərbaycanın tarixi, ölkəmizdə gedən siyasi, iqtisadi proseslər barədə geniş məlumat verib. Əsası ulu öndər Heydər Əliyev tərəfindən qoyulan, hazırda Prezident İlham Əliyevin uğurla davam etdirdiyi siyasi, iqtisadi islahatlar barədə danışan rektor Azərbaycanın müasir beynəlxalq münasibətlər sistemində yeri və rolunu qeyd edib. O, ölkəmizin innovativ tərəqqisi ilə bağlı BMT və digər nüfuzlu beynəlxalq qurumların qiymətləndirmələrinə əsaslanan təhlilləri də iştirakçıların diqqətinə çatdırıb.
Dövlət İdarəçilik Akademiyasının fəaliyyəti barədə danışan U.Ələkbərov qeyd edib ki, bu ali məktəbdə dərs deyən müəllim heyətinin əksəriyyəti ölkənin siyasi idarəçiliyində mühüm rol oynayır. DİA-nın Elmi təşkilat şöbəsinin müdiri, siyasi elmlər üzrə fəlsəfə doktoru, dosent R. Rəhimli və digər əməkdaşları da səfərdə iştirak edirlər. Burada əsas məqsəd tələbələrin təhsilin ilk günündən etibarən nəzəri biliklərlə yanaşı, praktik təcrübə ilə də tanış olmalarıdır. Akademiyada, həmçinin digər ixtisas sahibləri də dövlət idarəçiliyinin prinsiplərini öyrənir.
Milli Dövlət İdarəçilik İnstitutunun beynəlxalq əlaqələr departamentinin rəhbəri xanım Marta Simas Hernando İspaniyada dövlət idarəçiliyinin necə həyata keçirilməsi barədə məlumat verib. İnstitutun fəaliyyəti və strukturundan danışan Marta Simas Hernando bildirib ki, Azərbaycandakı ali təhsil ocağının nəzəri idarəçilik sahəsindəki təcrübəsi onlar üçün çox maraqlıdır və gələcəkdə ikitərəfli əməkdaşlıq hər iki ölkə üçün faydalı olardı.
Daha sonra hər iki tərəfi maraqlandıran suallar cavablandırılıb.