08 oktyabr 2025-ci il tarixində Azərbaycan Respublikasının Prezidenti yanında Dövlət İdrəçilik Akademiyasında “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın icrası çərçivəsində Naxçıvan Muxtar Respublikasının mərkəzi icra hakimiyyəti orqanlarında fəaliyyət göstərən dövlət qulluqçuları üçün “Dövlət qulluğuna dair qanunvericilik və onun tətbiqi” mövzusunda elmi-praktik təlim keçirilmişdir.

Təlim Dövlət İdarəçilik Akademiyasının əməkdaşı, hüquq üzrə fəlsəfə doktoru, dosent, əməkdar müəllim Nağıyev Fəxrəddin Tağı oğlu tərəfindən aparılmışdır. Tədbirin əsas məqsədi dövlət qulluğunun hüquqi-normativ bazasının dərindən öyrənilməsi, dövlət qulluqçularının normativ hüquqi aktlar kontekstində fəaliyyət səmərəliliyinin artırılması və dövlət idarəetməsində hüquq mədəniyyətinin yüksəldilməsidir.

Təlim çərçivəsində iştirakçılara Azərbaycan Respublikasında dövlət qulluğunun inkişaf mərhələləri, mövcud qanunvericiliyin məzmun və strukturu, həmçinin dövlət qulluğunda institusional islahatlar və etik davranış prinsipləri üzrə geniş izahat verilmişdir. Qanunvericilik normalarının tətbiqində qarşıya çıxan praktiki çətinliklər, onların həlli yolları və hüquqi mexanizmlər ətrafında müzakirələr aparılmış, dinləyicilərin çoxsaylı sualları cavablandırılmışdır.

Tədbir zamanı dövlət qulluğunda şəffaflığın, hesabatlılığın və məsuliyyətli idarəetmənin təmin olunmasında hüquqi maarifləndirmənin rolu vurğulanmış, dövlət qulluqçularının hüquqi hazırlıq səviyyəsinin artırılmasının vacibliyi elmi əsaslarla əsaslandırılmışdır.

Təlimin sonunda vurğulanmışdır ki, bu cür elmi-praktik təlimlərin təşkili insan kapitalının inkişafı, idarəetmədə hüquqi yanaşmaların gücləndirilməsi və dövlət qulluğunun institusional dayanıqlığının təmin olunması baxımından strateji əhəmiyyət daşıyır.