Dövlət İdarəçilik Akademiyasının tələbələrinin  Məzun günü keçirilib.

 

İyulun 7 də Müslüm Maqomayev adına Azərbaycan Dövlət Akademik Filarmoniyasında Dövlət İdarəçilik Akademiyasının tələbələrinin  Məzun günü  baş tutdu.

Azərbaycanın Dövlət Himni ilə başlayan tədbirdə çıxış edən DİA-nın rektoru akademik Urxan Ələkbərov müasir müstəqil dövlətimizin memarı və qurucusu, Ulu Öndər Heydər Əliyevin təhsilin inkişafına daim böyük önəm verdiyini, Ümummilli Liderin bu siyasətinin Prezident İlham Əliyev tərəfindən uğurla davam etdirildiyini bildirib. Rektor əsası Ulu Öndər Heydər Əliyev tərəfindən qoyulmuş bu təhsil ocağında dövlət idarəçiliyi sahəsində ixtisaslaşan kadrların perspektiv imkanlarını təhlil edib, Prezident İlham Əliyevin biliyə, təhsilin inkişafına göstərdiyi diqqətdən danışıb. Müasir dövrdə dövlətin gücü və qüdrətinin təkcə onun təbii sərvətləri ilə deyil, həm də elmi-intellektual potensialı ilə müəyyən edildiyini deyən Urxan Ələkbərov bildirib ki, məqsədimiz DİA-nın hazırladığı kadrların müasir tələblərə cavab verməyi bacarmaları, yeni nəslin formalaşmasında, insan potensialının inkişafı və davamlılığının təminində Azərbaycan dövlətinin həyata keçirdiyi prosesə töhfə vermək, dünya təhsil sisteminə inteqrasiyanı sürətləndirməkdən ibarətdir. Urxan Ələkbərov 2025 -ci ildə Akademiyanı bitirən məzunların  bundan əvvəlki illərdə olduğu kimi dünyanın ən qabaqcıl universitetlərində təhsillərini davam etdirəcəklərini qeyd edib. O bildirib ki, dövlət qulluğuna qəbul üzrə Akademiyanın  məzunları ön sıralarda yer alırlar və müxtəlif dövlət qurumlarında uğurla fəaliyyət göstərirlər.  

Daha sonra Milli Məclisin deputatı, İqtisadiyyatın dövlət tənzimlənməsi kafedrasının müdiri, dosent Azər Əmiraslanov, Milli Məclisin deputatı, Dövlət qulluğu və kadr siyasəti kafedrasının müdiri, professor Hikmət Babaoğlu, Milli Məclisin deputatı, Beynəlxalq əlaqələr kafedrasının professoru Elman Nəsirov,  Siyasi İdarəetmə fakültəsinin dekanı dosent Murtəza Həsənov, İnzibati idarəetmə fakültəsinin dekanı dosent Elnur Əliyev  çıxış ediblər. Çıxışçılar son illər Azərbaycanda təhsilin inkişafı istiqamətində görülmüş işlərdən danışıb, Azərbaycan Respublikasında təhsilin inkişafı üzrə Dövlət Strategiyasının uğurlarını qeyd ediblər. DİA-nın bu gün müstəqil Azərbaycanda dövlət quruculuğunun möhkəmləndirilməsi, milli dövlətçilik ideologiyasının təbliği sahəsində uğurlu fəaliyyət göstərən ali təhsil müəssisələri sırasında mühüm yer tutduğunu bildiriblər.

“Məzun günü” tədbiri bədii hissə ilə davam edib.