DİA-da Dövlət Miqrasiya Xidmətinin əməkdaşları üçün “Ümummilli Lider Heydər Əliyev müstəqil Azərbaycan Konstitusiyasının müəllifidir” adlı təlim keçirilmişdir

2025-ci il iyulun 25-də Azərbaycan Respublikası Dövlət Miqrasiya Xidmətinin əməkdaşları üçün Azərbaycan Respublikası Prezidentinin yanında Dövlət İdarəçilik Akademiyasında “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusuna həsr olunmuş təlim keçirilmişdir. Tədbirin əsas məqsədi Azərbaycan Respublikasının ilk Konstitusiyasının qəbul olunması prosesində Ümummilli Lider Heydər Əliyevin misilsiz xidmətlərini iştirakçıların diqqətinə çatdırmaq, bu mühüm hüquqi sənədin dövlət quruculuğundakı əhəmiyyətini izah etmək və dövlət qulluqçularında konstitusiya hüququ sahəsində bilik və yanaşmaları dərinləşdirmək olmuşdur.

Təlimdə Dövlət İdarəçilik Akademiyasının Hüquq kafedrasının müdiri, hüquq elmləri doktoru, professor İsaxan Vəliyev mühazirə ilə çıxış etmişdir. O, Ulu Öndər Heydər Əliyevin 1995-ci ildə Konstitusiya Komissiyasına rəhbərlik etməsini, Konstitusiyanın hazırlanmasında birbaşa iştirakını və bu prosesi ictimai müzakirələr əsasında şəffaf şəkildə həyata keçirməsini xüsusi vurğulamışdır. Təlim çərçivəsində həmçinin Konstitusiyanın qəbulundan əvvəl və sonrakı dövrdə həyata keçirilmiş hüquqi islahatlar, Konstitusiya Məhkəməsinin yaradılması, qanunvericilik təşəbbüsü hüququnun tənzimlənməsi və hüquqi dövlət quruculuğunda Konstitusiyanın rolu geniş şəkildə təhlil olunmuşdur.

Professor İsaxan Vəliyev çıxışında Konstitusiyanın preambulası və əsas prinsipləri barədə ətraflı məlumat vermiş, Heydər Əliyevin Konstitusiyanın əsas fəlsəfəsinə dair ifadə etdiyi bu fikirləri tədbir iştirakçılarının diqqətinə çatdırmışdır:

“Biz elə bir layihə hazırlamalı və nəhayət, elə bir Konstitusiya qəbul etməliyik ki, o, müstəqil Azərbaycan Respublikasının demokratik prinsiplər əsasında uzun müddət sabit yaşamasını təmin edən Əsas Qanun, tarixi sənəd olsun. Hakimiyyət bölgüsü – icra, qanunvericilik, məhkəmə hakimiyyəti – bunlar hamısı xalqın iradəsinə söykənməli, seçkilər yolu ilə təmin olunmalıdır.”

Mühazirədə qeyd olunmuşdur ki, Konstitusiyada təsbit edilmiş əsas prinsiplər – dövlətin müstəqilliyi, hakimiyyət bölgüsü, insan hüquq və azadlıqlarının müdafiəsi, qanunvericilik təşəbbüsü hüququ və vətəndaş cəmiyyətinin formalaşdırılması mexanizmləri – hüquqi dövlətin əsas sütunlarını təşkil edir. Professor Vəliyev vurğulamışdır ki, Konstitusiya yalnız hüquqi sənəd deyil, həm də xalqın iradəsinin ifadəsi, milli birliyin və dövlətin suverenliyinin təminatçısıdır. O əlavə etmişdir ki, Ümummilli Lider Heydər Əliyevin təşəbbüsü ilə 1995-ci ildə hazırlanaraq ümumxalq səsverməsi ilə qəbul edilmiş bu sənəd Azərbaycanın hüquqi, siyasi və inzibati sisteminin əsasını təşkil edən fundamental sənəddir.

Təlim çərçivəsində həmçinin hüquqi dövlət quruculuğu istiqamətində görülən işlər, Konstitusiya Məhkəməsinin fəaliyyəti və hüquqi nəzarət mexanizmləri, eləcə də son illərdə aparılmış konstitusiya islahatları barədə iştirakçılara ətraflı məlumat verilmişdir. Bu kontekstdə 2025-ci ilin ölkədə “Konstitusiya və Suverenlik İli” elan olunmasının mahiyyəti və hüquqi maarifləndirmə tədbirlərinin əhəmiyyəti də xüsusi qeyd edilmişdir.

Təlim interaktiv şəkildə təşkil olunmuş, iştirakçılar arasında sual-cavab sessiyaları keçirilmiş və real hüquqi vəziyyətlər üzərində praktiki müzakirələr aparılmışdır. İştirakçılar Ümummilli Lider Heydər Əliyevin siyasi və hüquqi irsinin müasir Azərbaycan cəmiyyətində, xüsusilə də hüquqi düşüncə və dövlət idarəçiliyi sahəsindəki əhəmiyyətini bir daha dərk etmişlər.

Tədbirin sonunda professor İsaxan Vəliyev Ümummilli Lider Heydər Əliyevin müstəqil Azərbaycan dövlətçiliyinin hüquqi əsaslarının formalaşdırılmasındakı əvəzolunmaz rolunu bir daha vurğulamış, iştirakçılara bu dəyərli irsi dərindən öyrənməyin və onu gələcək nəsillərə ötürməyin vacibliyini çatdırmışdır.