17 oktyabr tarixində Azərbaycan Respublikasının Prezidenti yanında Dövlət İdarəçilik Akademiyasında (DİA) Azərbaycan Respublikasının dövlət müstəqilliyinin bərpa edilməsinin 34-cü ildönümü münasibətilə dəyirmi masa keçirilmişdir.

Tədbirin əvvəlində Azərbaycan Respublikasının Dövlət Himni səsləndirilib, Ulu Öndər Heydər Əliyevin və Vətən uğrunda şəhid olmuş qəhrəmanların əziz xatirəsi bir dəqiqəlik sükutla yad edilib.

Dəyirmi masanı giriş sözü ilə açan DİA-nın rektoru, akademik Urxan Ələkbərov qeyd edib ki, ötən 34 il ərzində Azərbaycan xalqı müstəqilliyini qoruyaraq möhkəmləndirib, ölkəmiz regionun siyasi, iqtisadi və mədəni mərkəzlərindən birinə çevrilib. Rektor vurğulayıb ki, müstəqilliyimizin ilk illəri mürəkkəb sınaqlarla yadda qalsa da, xalqımızın birliyi və Heydər Əliyev kimi müdrik dövlət xadiminin siyasi iradəsi sayəsində Azərbaycan dövlətçiliyi dirçəldi, sabitlik və inkişaf dövrünə qədəm qoydu.
“Müstəqilliyimiz dönməzdir, əbədidir” – deyən Ulu Öndər Heydər Əliyevin strateji xətti bu gün Prezident cənab İlham Əliyevin rəhbərliyi ilə uğurla davam etdirilir, Azərbaycan beynəlxalq aləmdə müstəqil, güclü və nüfuzlu dövlət kimi tanınır,” – deyə akademik Urxan Ələkbərov çıxışında qeyd etmişdir.

Tədbirdə DİA-nın Tarix kafedrasının professoru, tarix elmləri doktoru Havva Məmmədova “Azərbaycanın dövlət müstəqilliyinin bərpası: tarixi və siyasi aspektlər” mövzusunda məruzə ilə çıxış edib. O, 1991-ci il 18 oktyabr tarixində qəbul edilmiş “Azərbaycan Respublikasının Dövlət Müstəqilliyi haqqında Konstitusiya Aktı”nın tarixi əhəmiyyətindən danışıb, bu sənədin əsrlərlə davam edən milli azadlıq ideallarının reallaşmasının simvolu olduğunu vurğulayıb. Professor qeyd edib ki, Azərbaycan Xalq Cümhuriyyətinin (1918–1920) dövlətçilik ənənələri 1991-ci ildə bərpa edilmiş müstəqil dövlətin ideoloji və siyasi əsasını təşkil edib.
Havva Məmmədova bildirib ki, müstəqilliyin ilk illərində ölkədə yaranmış siyasi və iqtisadi çətinliklər, Ermənistanın hərbi təcavüzü və daxili qarşıdurmalar dövlətçiliyimizi ciddi sınaq qarşısında qoymuşdu. “Bu dövrdə xalqın tələbi ilə hakimiyyətə qayıdan Ulu Öndər Heydər Əliyev müdrik siyasəti və qətiyyətli addımları ilə Azərbaycanı parçalanmaq təhlükəsindən xilas etdi, milli dövlətçiliyin möhkəmlənməsinə, beynəlxalq arenada nüfuzunun artmasına nail oldu, daha sonra Prezident İlham Əliyev Azərbaycan xalqına tarixi zəfər bəxş etdi,” – deyə professor əlavə edib.

Daha sonra çıxış edən DİA-nın Hüquq kafedrasının müəllimi, hüquq elmləri üzrə fəlsəfə doktoru, dosent Fuad İbrahimov müstəqilliyimizin hüquqi əsasları və onun konstitusion təminatından danışıb. O qeyd edib ki, 1995-ci ildə qəbul olunmuş Azərbaycan Respublikasının Konstitusiyası ölkəmizin hüquqi dövlət kimi formalaşması üçün möhkəm baza yaratdı. Fuad İbrahimov vurğulayıb ki, “Dövlət Müstəqilliyi haqqında Akt” təkcə siyasi sənəd deyil, həm də hüquqi baxımdan Azərbaycan xalqının öz müqəddəratını müəyyən etmək hüququnun reallaşması idi.
O əlavə edib ki, bu gün Azərbaycan Respublikasının hüquq sistemi beynəlxalq hüquq normalarına uyğunlaşdırılıb, qanunvericilik islahatları isə Prezident İlham Əliyevin rəhbərliyi ilə ardıcıl şəkildə həyata keçirilir. “Bu islahatlar nəticəsində insan hüquq və azadlıqlarının təminatı, idarəetmənin şəffaflığı, məhkəmə-hüquq sisteminin müasirləşməsi istiqamətində mühüm nəticələr əldə olunub,” – deyə dosent İbrahimov çıxışında qeyd etmişdir.

Tədbirin sonunda iştirakçılar arasında fikir mübadiləsi aparılıb.